ታዋቂ አሊም ሼኽ ጂላን አዳኖ( አቡ ዓብዱረህማን) መንግስት በሽብርተኝነት መክሰሱ ታወቀ

የመንግስት የደህንነት ሃይሎች በአካባቢው ሙስሊም ህብረተሰብ ዘንድ በጣም ተወዳጅ የሆኑትን ፣ ጠዋት ማታ ህዝቡን በማስቀራት ፣ ዳዕዋ በማድረግ እና በዛሂድነታቸው የሚታወቁትን : እኒህን ኣሊም ለሃያ ሰባት ቀን ያክል በማዕከላዊ ካሰቃዩዋቸው በኃላ : በትላንትናው እለት ሰኞ ነሀሴ 17 በአራዳ ምድብ ችሎት በማቅረብና በሽብርተኝነት በመክሰስ ተጨማሪ የሀያ ስምንት ቀን ቀጠሮ እንደጠየቁባቸው ምንጮቻችን ገልፀዋል።

አብሮዋቸው ታስሮ የነበረውና ከቦረና የመጣው ዳዒ መሊቹ ሁቃ : ከተወሰኑ ቀናት እስር በኃላ መለቀቁን የገለፁት ምንጮቻችን : በእንግድነት ያረፋበት ቤት ባለቤት የሆነው አቶ ሪድዋን ግን አሁንም ድረስ አለመፈታቱን : ነገር ግን በእርሳቸው ላይ በሀሰት እንዲመሰክር በየቀኑ ጫና እየፈጠሩበትና እያሰቃዩት መሆኑንና በቤተሰቡ ግን እየተዘየረ መሆኑን ጠቅሰዋል ።

እኚን በህዝባቸው ዘንድ ተወዳጅ ተሰሚና ትልቅ ቦታ ያላቸው ታላቅ ኣሊም ከቤተሰብ ከወገናቸው አለማገናኘቱ ሳያንሰው እሳቸውን በሽብርተኝነት ከሶ የሃያ ስምንት ቀን ቀጠሮ ጠይቆባቸዋል።

መንግስታዊ ዳኞችም በአቃቤ ህግ የተጠየቁትን የሃያ ስምንት ቀን : ተጨማሪ ቀነ ቀጠሮ ተቀብለው ለመሰከረም 11 2008 ቀጠሮ ሰጥተዋል። የፍርድ ቤቱን ሂደት የተከታተሉትና: በቅርብ የሚያውቋቸው ሙስሊሞች የሚወዷቸው ሼክ በጣም ተጎሳቁለው ያለ ኮፍያ ራሳቸው ተከፍቶ ሲያዩ ስሜታቸውን መቆጣጠር እንዳልቻሉና እንዳለቀሱ ምንጮቻችን አያይዘው ገልፀዋል።

መንግስት በሙስሊሙ ኀብረተሰብ ላይ እያደረሰ ያለውን ጫና: ከእለት ወደ እለት አጠናክሮ መቀጠሉን የገለፁት ታዛቢዎች : ኢስላም ትልቅ ቦታ የሚሰጣቸው ኡለሞች ላይ እንዲህ አይነት ግፍ የተሞላበት እርምጃ መጀመሩ : ይህ መንግስት የትናንት አፄዎች : በአባቶቻችን ላይ በእምነታቸው ምክንያት ብቻ ይወስዱባቸው የነበረውን ጭካኔ የተሞላበት ተግባር : ዛሬ የእነሱ ልጅ በሆነው በኛ ላይ ለመድገም እየተንደረደረ መሆኑን በአንክሮ ገልፀው : ሙስሊሙ ህብረተሰብ የዲኑ ብርሃን በሆኑት ኡለማዎች እና በዲኑ ላይ እየተፈፀመ ያለውን ደባ በአንክሮ እንዲከታተለውና : መክፈል ያለበትን መሰዋእትነት ሁሉ በመክፈል ዲኑን እና የዲኑ ብርሃን የሆኑትን ኡለማዎች እንዲጠብቅ አደራ ብለዋል።

አላህ ሱ:ወ ዲኑን ኡለማዎቻችንና መላውን ሙስሊም እንዲጠብቅ እንማፀነዋለን !!!