የአቡነ መቃርዮስ የገና በዓል መልዕክት
በሕጋዊው የኢ/ኦ/ተ/ቤ/ክ ቅዱስ ሲኖዶስ የአውስትራልያና የኢየሩሳሌም አህጉረ ስብከት ሊቀ ጳጳስ የሆኑት አቡነ መቃርዮስ የልደት በዓልን አስመልክተው መልዕክት አስተላልፈዋል። አቡነ መቃሪዮስ በዚሁ መልዕክታቸው ነጻነቱን አጥቶ በእስር ቤት እየተሰቃየ በየአደባባዩ እየተገደለና ከክብሩ እየተዋረደ ያለውን ኢትዮጵያዊውን ወገናችንን ማስታወስ እንዳለብን ተማፅነው፣ በቅርቡ በባህር ዳር ከተማ ዘረኛው የወያኔ አገዛዝ “ጥምቀተ ባህር አይሸጥም አይለወጥም የታቦት ማረፊያችንንም አሳልፈን አንሰጥም” በማለታቸው በአደባባይ በጥይት ለገደላቸው ወጣቶች የኢትዮጵያ አምላክ ልዑል እግዚአብሔር እረፍተ ነፍስ ይስጥልን ብለዋል። ቤተሰቦቻቸውንም በዚህ የሰላምና የመጽናናት በዓል በቅዱስ መንፈሱ እንዲያጽናናልን እንጸልያለን ብለዋል። በደብረ ማርቆስና በአካባቢው በህጻናት፣ ተማሪዎችና በነዋሪዎች ላይ የሚደርሰው ድብደባና አፈሳ፤ በመፈጸም ላይ መሆኑንና በሌሎችም ልዩ ልዩ የሀገራችን ክፍሎች የሚደርሰው ማፈናቀል ስውር ግድያና እስራት ለሀገራችንና ለቤተክርስቲያናችን በአጠቃላይ ለህዝባችን ታላቅ ሀዘንና ፈተና መሆኑ ከሁላችንም የተሰወረ አለመሆኑን አመልክተዋል።
ከዚህም አያያዘው ወያኔ በውጭ ሀገር የሚኖረው ኢትዮጵያዊ ተባብሮ ሥራ እንዳይሠራና ለወገኑ እንዳይደርስ እርስ በርስ በመለያየት እንዲጣላና ሰላም እንዳይኖረው በክፍለ ሀገር፤ በዘርና በጎሳ በመበታተን ቤተክርስቲያኑን እንዳይሠራ ጠንካራ የኢትዮጵያውያን ማኅበር እንዳይኖር አንዱ የሌላውን ስም እንዲያጠፋው የውሸትና የፈጠራ ወሬን በመንዛት በስውር ወኪሎቹ የጥፋት ሥራውን እያከናወነ እንደሚገኝ አጋልጠዋል። አቡነ መቃርዮስ ያስተላለፉትን መልዕክት ሙሉ ቃል ለማንበብ እዚህ ላይ ይጫኑ። የአቡነ መቃሪዮስ የልደት በዓል መልዕክት
አቡነ መቃሪዮስ ለእውነት የቆሙ አባት ናቸው። ለሌሎችም አስመሳይ የሐይማኖት መሪ ነኝ ባዮችም ትልቅ ትምህርት የሚሰጡ ናቸው። ዛሬ በተለይ በአሜሪካ የሚገኙ እነደነ መምህር ዘበነ ለማ ያሉት ኢትዮጵያ አየሄዱ መንሸራሸራቸውን ወያኔ አንዳይከለክላቸው በመስጋት አገራችን ውስጥ የሚደረገውን ግፍና ሰቆቃ እያዩ እንዳለየ አጭበርብሮ ማለፉን መርጠዋል። የነሱ ምቾት አስካልተጓደለ ድረስ፣ የንጹሀን ወገኖቻችን መገደል፣ መሰቃየት፣ መታሰር ምንም አይመስላቸውም። ለምን ዝምታን እንደመረጡ ሲጠየቁ “እኛ በጸሎት ነው መልስ የምናገኘው” ይላሉ። በግፍ ለተገደለ ነፍስ ይማር ብለው ሲጸልዩና የታሰሩትን አስፈታልን ሲሉ አይሰሙም። የነሱ ጸሎት ደምጽ የሌለውና የማይሰማ በምን መንገድ የሚተላለፍ ይሆን?ለምሳሌ በቅርቡ ባሕርዳር ለሐይማኖታቸው የተሰውትን አስመልክቶ “እግዚያብሔር ነፍሳቸውን ይማር” ብሎ መጸለይም ፖለቲካ ሆኖ አንደተራ ነገር እንዲታለፍ ተደርጓል። አቡነ መቃሪዮስ ግን ሳይፈሩና ለራሳቸው ሳይሳሱ ወንጌል እንዳስተማረን ከታሰረው፣ መከራ ከሚወርድበትና ከተቸገረው ጎን መቆማቸውን በተለያየ ጊዜ አሳይተውናል። እኛም ይደልዎ፣ ይበርቱ፣ ይቀጥሉበት እንላለን።