የአዕምሮ ጤና ችግር ያለባቸው ሰዎች ከተደጋጋሚ ባህላዊ ሕክምና በኋላ ወደ ሆስፒታል ይመጣሉ ተባለ Ethiopian mental health patients prefer traditional to modern medicine

     የአዕምሮ ጤና ችግር ያለባቸው ሰዎች ከዘመናዊ ህክምና ይልቅ ባህላዊ ሕክምናን እየተከታተሉ እንደሚገኙ ተገለፀ።

የኢትዮጵያ አዕምሮ ጤና ማኅበር “የአዕምሮ ጤና በኢትዮጵያ፤ ተግዳሮቶች እና መልካም አጋጣሚዎች” በሚል ርዕስ ባዘጋጀው ጉባኤ ላይ የቀረበ ጥናት እንዳመለከተው በሀገሪቱ በከፍተኛ የአዕምሮ ጤና ችግር ውስጥ ያሉ ሰዎች ሳይቀሩ ወደ አዕምሮ ህክምና የሚመጡት በተደጋጋሚ ወደ ባህላዊ ህክምና አምርተው ለውጥ ማግኘት ባለመቻላቸው ነው። በጥናቱ እንደተመለከተው ወደ አዕምሮ ጤና ህክምና ከሚመጡት የአዕምሮ ጤና ችግር ካለባቸው ሰዎች መካከል 60 በመቶዎቹ በአማካይ አራት ባህላዊ ህክምና ሰጪዎችን የተከታተሉ ናቸው። በተለያዩ የሀገሪቱ አካባቢዎች የሚገኙ የአዕምሮ ጤና ችግር ያለባቸው ሰዎች ብቻም ሳይሆኑ በአዲስ አበባ ያሉ ጭምር ወደ ሆስፒታል ከመሄድ ይልቅ ባህላዊ ህክምናዎችን ያዘወተራሉ።

የአዕምሮ ጤና ችግርን በዘመናዊ ህክምና ይድናል ብሎ ወደ ዘመናዊ ህክምና አለመሄድ በእኛ ሀገር ብቻም ሳይሆን ባደጉት ሀገራት ጭምር ያለ ችግር መሆኑ በጥናቱ የተገለፀ ሲሆን፤ ሆኖም ግን በሀገራችን ያለው ሁኔታ በርካቶች በዘመናዊ ህክምና መዳን ሲችሉ እድሉን እንዳያገኙ እያደረጋቸው መሆኑ ተገልጿል። ብዙዎች የአዕምሮ ጤናን ከተለያዩ ባህላዊ አስተሳሰቦች ጋር እያያያዙ ከዘመናዊ ህክምና እንደሚርቁም ተገልጿል።

     በኢትዮጵያ የአዕምሮ ጤና ታሪክ ሲነሳ ለዘርፉ ብዙም ትኩረት ባለመስጠቱ በቂ የአዕምሮ ጤና ሆስፒታሎችን እንኳን መክፈት አልተቻለም። በሀገሪቱ የአዕምሮ ጤና ህክምና በመስጠት ረገድ አብዛኛውን አገልግሎት እየሰጠ የሚገኘው አማኑኤል ሆስፒታል ቢሆንም ሆስፒታሉ በአሁኑ ወቅት ከፍተኛ ቁጥር ያላቸው ሰዎችን ከአቅሙ በላይ በሆነ ሁኔታ እያስተናገደ ይገኛል። ሆስፒታሉ ያለበት አካባቢ ፀጥታው እና ደህንነቱ እንዲሁም ንፅህናው ያልተጠበቀ መሆኑ ለታካሚዎች ተገቢውን እርካታ ለመስጠት አላስቻለውም ተብሏል።