አስገደ ገ/ስላሴን ጨምሮ በትግራይ የሰማያዊ እጩዎች ታገዱ

ስለጉዳዩ የክልሉን ምርጫ ቦርድ ኃላፊ አቶ ወልደጊዮርጊስ በላይን ማነጋገራቸውን የገለጹት አቶ አስገደ፣ ‹‹እኛ ብሄራዊ ምርጫ ቦርድ ያለውን ትዕዛዝ ነው የምንፈጽመው፡፡ አግዱ ከተባልን እናግዳለን፤ አታግዱ ከተባልን አናግድም፡፡ አሁን ከምርጫው ሙሉ ለሙሉ ተሰርዛችኋላ ማለት ባልችልም መታገዳችሁ ከብሄራዊ ምርጫ ቦርድ የተላለፈ ትዕዛዝ ነው›› የሚል መልስ እንደተሰጣቸው ገልጸዋል፡፡

ለእግዱ መነሻ አድርገው የሚያቀርቡት ከአንድነት ፓርቲ መምጣታችንን ነው ያሉት አቶ አስገደ፣ አንድ ሰው ፓርቲን ወክሎ ምርጫ ለመወዳደር የት ነበርክ ተብሎ የሚጠየቅበት የህግ አግባብ የለም ብለዋል፡፡ አንድ እጩ ኢትዮጵያዊ መሆኑ፣ 23 አመትና ከዚያ በላይ መሆኑ እና ሌሎች መስፈርቶች እንጂ ቀድሞ የነበረበት ፓርቲ እንቅፋት ሊሆንበት አይችልም ሲሉ አስረድተዋል፡፡ የሰማያዊ ፓርቲ ህግ ደንብ በሚፈቅደው መሰረት በስራ አስፈጻሚ ሙሉ አባል ተደርገው ፓርቲውን እንደተቀላቀሉ የገለጹት አቶ አስገደ፣ አሁን ምርጫ ቦርድ እያነሳው ያለው ሰበብ ምንም ውሃ የማይቋጥር እንደሆነ ተናግረዋል፡፡

‹‹የምርጫ ቦርድ ሰዎች ውዥንብር ለመፍጠር ነው የመጣችሁት ቢሉንም እኛ ግን ባመንበት ፓርቲ ገብተን መታገል መብታችን መሆኑን እናውቃለን፡፡ አሁንም በሰማያዊ ፓርቲ ስር ለእጩነት የቀረብንበት አግባብ ምንም አይነት የህግ ችግር የለበትም፡፡ አላግባብ መብታችንን እየጣሱ ነው›› ብለዋል አቶ አስገደ፡፡