አቶ አንዳርጋቸው ጽጌ ወደ ኢትዮጵያ ተላልፈው መሰጠታቸውን ሂውማን ራይትስ ወች ገለጸ
ሰኔ ፴(ሠላሳ)ቀን ፳፻፮ ዓ/ም ኢሳት ዜና :-ታዋቂው የሰብአዊ መብት ተሟጋች ሂውማን ራይትስ ወች ባወጣው አስቸኳይ መግለጫ፣ አቶ አንዳርጋቸው ከማንም ጋር እንዳይገናኙ ተደርጎ ለኢህአዴግ የጸጥታ ሃይሎች ተላልፎ መሰጠቱን ከታማኝ ምንጭ ማግኘቱን ገልጿል።
የየመን ባለስልጣናት ሰነዓ ከሚገኘው ኤል ራህባ አየር ማረፍያ ላይ እኤአ ጁን 23 ወይም 24 ከእንግሊዝ ኢምባሲ ጋር እንዳይገናኝ አድርገው አቶ አንዳርጋቸውን ወዲያውኑ ወደ ኢትዮጵያ ልከውታል ሲል ሂውማር ራይተስ ወች አስታውቋል።
የአፍሪካ ምክትል ዳይሬክተር ሌስሊ ሌፍኮው የአቶ አንዳርጋቸው ደህንነት እንደሚያሰጋቸው ገልጸው፣ መንግስት ከቤተሰቦቻቸው፣ ከጠበቆቻቸውና ከእንግሊዝ ኮንሱላር ሰራተኞች ጋር እንዲገናኙ እንዲፈቅድ ጠይቀዋል።
አለም በሙሉ የአቶ አንዳርጋቸውን ጉዳይ በአንክሮ እየተከታተለው መሆኑን የኢትዮጵያ ባለስልጣናት ልብ ሊሉት ይገባል ሲሉ ሌፍኮው ተናግረዋል።
አምነስቲ ኢንተርናሽናል ባወጣው መግለጫ ደግሞ አቶ አንዳርጋቸው ጽጌ ከየመን በሃይል ወደ ኢትዮጵያ እንዲወሰዱ መደረጋሸውን በአገሪቱ የሚገኙ የሰብአዊ መብት ድርጅቶችን ጠቅሶ ዘግቧል።
በኢትዮጵያ የፖለቲካ እስረኞች ከፍተኛ የሆነ ስቃይ እንደሚደርስባቸው የገለጠው አምነስቲ፣ በአቶ አንዳርጋቸውም ላይ ከፍተኛ ስቃይ ሊደርስበት ይችላል ሲል አክሏል።
አምነስቲ አያይዞም ከቅርብ ጊዜ ወዲህ ከጎረቤት አገሮች የጸጥታ ሃይሎች ጋር በመተባበር በርካታ ኢትዮጵያውያን ያለፍላጎታቸው ወደ አገራቸው እንዲመለሱና ስቃይ እንዲደርስባቸው እየተደረገ መሆኑን ገልጿል።
አምነስቲ የኢትዮጵያ ባለስልጣናት አቶ አንዳርጋቸው የታሰረበትን ቦታ እንዲያስታውቁ ጠይቋል።
መብረቅ ሆኖ ወደቀ!!!
xxxxooooxxxxx
አርበኛ አንዳርጋቸው፤
ግፍ የማይመቸው፤
ልቡ እንዳሸመቀ፤
ወኔው እንደታመቀ፤
በክህደት ሴራ በድኑ የተሰረቀ፤
በባንዳዎች ዱላ በሞት እየሳቀ፤
የልቡንም ፅናት ቀድሞም ስላወቀ
በጡት ነካሽ እጆች፣
መብረቅ ሆኖ ወደቀ።
ወደቀ ሳያውቀው ሊፈ-ፀም ትንቢቱ፤
በሥም ተጠቅልሎ ያገኘው ካባቱ።
ጉድጓዶች ሊያስቆፍር በኢትዮጵያዊነቱ፤
ጠላቷን ሊያከስም ገባ ከምድሪቱ።
መርዝ ሆነ በእጃቸው፤
መብረቁ አንዳርጋቸው።
አንዳርጋቸው ፅጌ የለም-አለም ያለው፤
ይሁዳዊው የመን ዶላር ያቀለለው፤
ለጉጅሌው ቡድን በህቡህ የሸጠው፤
ዜግነቱን አውቆ እንደሸመጠጠው፤
የእግዜርን-ክንድ መምጪያ:-
ክደውታልና፤
ዛሬ አለ ብለው ላኩት ትናንትና።
ሞትን ግን ሲጠብቅ የገባ በእጃቸው፤
በታሪክ አይሞትም፣
መብረቁ አንዳርጋቸው።
እነዚህ እፉኝቶች በመንግሥት ሥም ያሉ፤
በመግደል በማፈን ዕድሜ የቀጥሉ፤
ልባቸው ጫካ ነው እንደደነቆረ፤
እሳት መስሎ ካመድ
ያኔ የተፈጠረ::
የእሳት ልጅ አመድ ነው፣
ይባላል ከጥንቱ፤
መብረቅ ግን ባለ-አመድ፣
አይደለም ዕውነቱ።
መብረቁ አንዳርጋቸው
በደም አንድ ሊያደርገን፤
በእሳት-ልጆች አመድ፣
መብረቁን ታደገን።
መብረቆች መች መጡ ገና ይታያሉ፤
እንዲህ በክፉ ቀን መብረቅ ነን እያሉ።
ያንዳርጋቸው መብረቅ በእልህ እያጫራቸው፤
በአንድነት አምርረው ነፃነት ይጥራቸው።
ይህን የሥጋ ትል፤
ሕዝብን የሚገድል፤
ቢጠፋ ባገሩ በቃችሁ የሚላቸው፤
መርዝም
መብረቅ ሆኖ፣
ወደቀ አንዳርጋቸው።
እናም
በየተራ እየመረዛቸው፤
መብረቆቹ በዝተው፤ባሉበት ፈጃቸው።
ሁሉም ወዮላቸው፤
መጥቷል አንዳርጋቸው።